Bu gün Əməkdar bədən tərbiyəsi və idman xadimi, professor Ağacan Abiyevin 85 yaşı tamam olur.

A.Q.Abiyev 1937-ci il noyabrın 24-də Bakının Bülbülə qəsəbəsində anadan olub. O, Azərbaycan Dövlət Bədən Tərbiyəsi və İdman Akademiyasının rektoru (1987-2015), Azərbaycan Boks Federasiyasının prezidenti (1984-2009), Avropa Olimpiya Komitəsinin (AOK) İcraiyyə Komitəsinin və Texniki Komissiyasının üzvü (1998-2006), Dünya Boks Federasiyasının (AİBA) İcraiyyə Komitəsinin üzvü (2002-2012), Avropa Boks Federasiyasının (EABA) vitse-prezidenti (2002-2012), Afina-2004 XXVIlI Yay Olimpiya Oyunlarının boks üzrə baş hakimi, Azərbaycan Respublikanın Milli Olimpiya Komitəsinin baş katibi (1997-2021), Azərbaycan Respublikasının Milli Məclisinin üç çağırış deputatı (2005, 2010, 2015), Milli Məclisin İntizam Komissiyasının sədri (2010-2020) olub.

A.Q.Abiyev, 1991-ci ildə Azərbaycan Respublikasının "Əməkdar Bədən Tərbiyəsi va İdman xadimi" fəxri adına, 2001-ci ildə "Şöhret" ordeninə, 2007-ci ildə Azərbaycan Respublikasının "Əməkdar elm xadimi" fəxri adına, 2012-ci ildə 3-cü dərəcəli "Vətənə xidmətə görə" ordeninə, 2017-ci ildə isə "Şərəf" ordeninə layiq görülüb.

Gənclər və İdman Nazirliyi Ağacan Abiyevi 85 illik yubileyi münasibəti ilə təbrik edir, ona uzun ömür və can sağlığı arzulayır.