Respublika Təcili və Təxirəsalınmaz Tibbi Yardım Mərkəzinin Quba, Xaçmaz və Qusar üzrə təcili tibbi yardım stansiyalarının tibb heyəti təlimə cəlb edilib.

Respublika Təcili və Təxirəsalınmaz Tibbi Yardım Mərkəzinin Quba, Xaçmaz və Qusar üzrə təcili tibbi yardım stansiyalarının tibb heyətinə digər şimal rayonlarında olduğu kimi təlim keçirilib.

Mərkəzin direktor müavini Ramin Tahirzadənin rəhbərliyi ilə baş tutan təlimdə tibb işçilərinə peşə bacarıqlarının artırılması istiqamətində geniş məlumat verilib, ambulansların texniki imkanları, onların üstünlükləri barədə iştirakçıları məlumatlandırıb.

Həmçinin bu avtomobillərdə quraşdırılmış müasir tibbi avadanlıqlar, onların funksiyaları, istifadə qaydaları və təcili yardım zamanı tətbiq olunma prinsipləri izah edilib.

Təlim prosesində tibb heyətinə nəzəri biliklərlə yanaşı, praktiki bacarıqların artırılması üçün xüsusi təcrübə məşğələləri də təşkil olunub. Bu, tibb heyətinə həm yeni avadanlıqlardan səmərəli istifadə, həm də təcili tibbi yardım xidmətinin keyfiyyətini yüksəltmək imkanı yaradır.

Təlimin sonunda iştirakçılar yeni ambulansların funksionallığını yaxından sınamaq, suallar vermək və praktiki bacarıqlarını möhkəmləndirmək imkanı əldə ediblər.

Xatırladaq ki, bu cür təlimlər daha əvvəl Balakən, Zaqatala, Qax, Şəki, Oğuz və Qəbələ bölgələrində də keçirilib.