Açıq məktub.

Şamaxıda teatrın taleyi barədə..

Bir müddət sevindim ki, Şamaxıda teatr var. Hətta qürur hissi ilə professor İlham bəyin tədbirlərində iştirak etdim, tamaşalara baxdım. O vaxtlar teatr bizim üçün bir ümid, bir nəfəs idi. Amma nədənsə, bu teatrı külək apardı. Niyə apardı, necə apardı, kim apardı bilinmir.

Hörmətli rəhbərlik, hörmətli mədəniyyət işçiləri !

Biz necə deyə bilərik ki, Şamaxıda mədəniyyət var, əgər teatrımız yoxdursa? Hanı bizim teatrımız, hanı aktyorlarımız? Halbuki bu şəhərdə yaxşı aktyorlar yığılıb, tamaşalar hazırlanırdı. Şamaxı təkcə bir rayon deyil, dörd rayona mərkəzdir. Belə bir mərkəzdə teatrın olmaması doğrudanmı qəbul ediləndir?

Bəs biz hansı mədəniyyətdən danışaq? Hansı incəsənətdən danışaq? Əgər teatr, musiqi, sənət yoxdursa, deməli, biz gələcək nəsillərə mədəni irs ötürə bilmirik. Dövlət tərəfindən mədəniyyət sarayları tikilir, böyük vəsaitlər ayrılır. Amma onların ruhu, yəni teatr, hanı ?

Mənim rəhbərliyə, mədəniyyət sahəsinin məsul şəxslərinə sadə, amma çox ciddi sualım var ki;

- Niyə Şamaxıda teatr yoxdur?

Niyə digər rayonlarda teatr yoxdur?

Mədəniyyət işçilərinə hörmətim sonsuzdur, onların zəhmətini qiymətləndirirəm. Ancaq məsələ ondadır ki, əgər teatr yoxdursa, əgər aktyorlarımız səhnəsiz qalıbsa, o zaman bu zəhmətin, bu tikililərin hansı faydası var?

Bizim teatrımız olmalıdır. Bizim incəsənətimiz yaşamalıdır. Əks halda, hər şey məhvə doğru gedəcək.