Velosipetcilərin cəmiyyət üçün görünməyən təhlükəsi.

Cəmiyyətimiz müxtəlif təhlükələrlə üz-üzədir sosial, iqtisadi, daxili, xarici… 

Amma bunların arasında görünməyən, gizli, çox təhlükəli bir düşmən var. Onun adı velosiped sürənlərdir (velosiped, skuter, birtəkər ).

Bunlar nə maşın alırlar, nə kredit götürürlər, nə də bankların üstünə “Allahın salamını” göndərirlər. Avtomobil bazarı bunların üzündən göz yaşı tökür. Kreditlə maşın satan şirkətlər isə bu gedişlə bağlanmaq təhlükəsi ilə üz-üzədir.

Benzin bunlar üçün  yalnız şəkil albomunda görür. Yollardakı yanacaqdoldurma məntəqələri bunların yanından ötərkən sanki hörmətsizlik hissi keçirir.

Zapas hissələri. Bunların qırılan təkəri olsa, birbaşa 10 manatlıq rezin alır, ustanın, bazarın ruzisini əlindən alır.

Cərimələr. Bunlar radar tanımır, qayda pozmur, yol  verdiyi pul sıfır manatdır. Bu, artıq dövlət büdcəsinə açıq sabotajdır.

Parkovka.Bunların park yeri ağacın kölgəsi, divarın yanı, hətta bir dükkanın qabağıdır dayanır. Bir qəpik də pul ödəmirlər.

Ən qorxulusu isə odur ki, bunlar sağlam qalırlar. Xəstələnmirlər, həkimə getmirlər, aptekdən dərman almırlar. Tibbi sığorta onlara yalnız plastik kart kimi gərək olur. Qısası, iqtisadiyyatı canlandırmaq üçün öskürmürlər.

Belə getsə, velo sürənlər cəmiyyəti tamamilə məhv edəcək, bank bağlanacaq, apteklər işıq pulu ödəyə bilməyəcək, yanacaqdoldurma məntəqələri muzeyə çevriləcək.

Təklif edirəm ki, dərhal Velo Vergisi tətbiq edilməlidir. Kim velosiped sürürsə, sürmə haqqı ödəsin. Skuter sürənlərə aylıq benzin almama vergisi qoyulsun. Həkimə getməyən hər kəsdən isə xəstələnməmə cəriməsi tutulsun. Ancaq bu yolla cəmiyyətin  bazarı canlana bilər.

Yoxsa belə getsə, sağlam cəmiyyətin iqtisadiyyatı dağıdacaq…