Erməni teleqram kanallarında Şuşada Mamayı bulağı üzərində qurulan tikili üzərində olan ermənicə yazılanları silinməsinə etiraz edirlər. Amma onlar bu tarixi abidənin 1992-ci ildə erməniləşdiriklərini etiraf etmirlər. 

Şuşada ilk bu tipli bulağı Xan qızı Nətavan çəkdirib. Sarıbaba təpəsindəki su mənbəyindən su çəkildi, "Xan qızı bulağı" yaradıldı. Uzunluğu 15, eni 7, hündürlüyü 4 metr olan bulaq 12 daş gözdən ibarət idi. İkinci bulağı isə 1900-cu ildə tanınmış sahibkar, şuşalı Səməd ağa Cavanşirov çəkdirib. O, 10 min manat pul xərcləyib Şuşada Mamayı adlanan məhəlləyə içməli su kəməri çəkdirərək, şəhərin su təchizatı problemini demək olar ki, aradan qaldırdı. Mamay məhəlləsi Şuşanın mərkəzi hissəsində yerləşir. Şuşanın digər məhəllələri kimi burada da məscid, bulaq, kiçik meydan və hamam olub. Şuşada tarixi keçmişimizi silməyə çalışan ermənilər  XIX əsrin yadigarı olan məscidi dağıdıblar. Mamayı məscidi Qarabağda yeganə tikili olub ki, üstündə Əzan vermək üçün "Gültəsdə" tikilib. Ermənilərin Şuşanı işğal edən günə qədər bulağın yuxarı hissəsində kitabə olub. Kitabədə bulağın hicri tarixi ilə 1318-ci ildə, yəni miladi təqvimi ilə 1900-cu ildə Səməd ağa Cavanşir tərəfindən tikildiyi yazılıb. Erməni işğalçıları Şuşa şəhərindəki bir çox abidələr kimi Mamay bulağını da erməniləşdirməyə çalışıblar. Belə ki, bulağın üzərindəki yazılar silinib və yerinə xaç işarəsi həkk olunub. Bundan başqa ermənilər saxtakarlıq edərək bulağın daşlarının üzərinə erməni və rus dilində yazılmış lövhə də həkk ediblər.

Bu gün bunların sökülməsi tarixi həqiqətin və mədəni abidənin bərpasıdır. Allah Səməd ağaya rəhmət eləsin.

Zaur Alıyev, 

dosent