Rusiya Federasiyasının Müdafiə Nazirliyi orduda zərbə robot sistemləri ilə təchiz olunmuş ilk bölməni yaradır. Bu barədə Müdafiə Nazirliyinin mətbuat xidməti məlumat verib.

“Uran-9” kompleksləri ilə təchiz olunmuş ilk təcrübə bölməsi Müdafiə Nazirliyinin elmi-tədqiqat mərkəzlərindən birinin bazasında yaradılır. Yeni yaradılan bölmə əvvəlcə, belə bölmələrin tətbiqi üsullarının və formalarının hazırlanması ilə məşğul olacaq, daha sonra mərkəzin bazasında “Uran-9” komplekslərinin və hələlik qoşunlara tədarük edilməmiş digər komplekslərin istifadəsi üçün kadrların hazırlanmasına başlayacaq.

Quru Qoşunlarının baş qərargahının rəisi general-polkovnik Vasili Tonkoşkurovun sözlərinə görə, “Rusiya Federasiyası Silahlı Qüvvələri beş dəst “Uran-9” robot sistemi və ya 20 döyüş maşını daxil olacaq zərbə robotlu ilk bölmə yaradacaq”.

Əvvəllər “Uran-9” kompleksləri yalnız fərdi olaraq istifadə olunurdu. “Uran-9” kompleksi 2016-cı ildə Rusiya ordusu tərəfindən qoşun sınaqlarına qəbul edilmiş, lakin kompleksin eksperimental döyüş əməliyyatı zamanı idarəetmə, hərəkətlilik, atəş gücü, kəşfiyyat və müşahidə funksiyalarında çoxsaylı çatışmazlıqlar aşkar olunmuşdu. Modernləşmədən sonra kompleks 2020-ci ildə bitən dövlət sınaqlarına girmişdi.

“Uran-9” kompleksinin tərkibinə məsafədən idarəolunan dörd tırtıllı döyüş maşını, bir idarəetmə məntəqəsi və onların daşınması üçün nəqliyyat vasitəsi daxildir.

Döyüş maşınlarının əsas silahlanması 1 ədəd 30 mm-lik 2A72 avtomatik topundan və 1 ədəd qoşalaşdırılmış 7,62 mm-lik pulemyotumdan, 4 ədəd tank əleyhinə idarə olunan "Ataka" raketləri olan TƏİRK-dən və 12 ədəd RPO-A "Şmel-M" reaktiv odsaçanından ibarətdir. Yerinə yetirilən döyüş tapşırıqlarından asılı olaraq kompleks DZRK ilə əlavə silahlandırıla bilir.

“Uran-9” döyüş maşınının işləmə məsafəsi təxminən 1 km, çəkisi 7 tona qədərdir və mühərriki 190 at gücünü ötür.