Azərbaycan şairi, qəzəlxan, Əməkdar incəsənət xadimi Əliağa Vahidin doğum günüdür (Əliağa Məmmədqulu oğlu İsgəndərov; 17.02.1895, Bakı – 01.10.1965, Bakı). 

Olacaq

Nə qədər eşqimiz , ey gül , belə pünhan olacaq,

Aşikar eyləməyincə ürəyim qan olacaq?

Nə qədər gül üzünün həsrətin aşiq çəksin,

Nə zaman vəslinə bəs yetməyə imkan olacaq?

Bəs haçan rəhm edəcək bülbülü – biçarəyə gül

Nə qədər bəs o fəğirin işi əfğan olacaq?

Eşqdən başqa nə dərd olsa yenə çarəsi var,

Ayrılıq dərdinə, bilməm necə dərman olacaq?

Öz xoşumla o qarə zülfə əsir oldum özüm,

Bilmədim, xatirim eşqində pərişan olacaq.

Sən götürt məscidi zahid , bizə meyxanəni ver,

Kim bu işdə görək axırda peşiman olacaq?

Hələ Vahid , meyə meyl eyləmə , qoy gəlsin o gül,

Yarsız yerdə mey içmək bizə nöqsan olacaq.