Ağdama tramvay xətti çəkiləcək! 

100 min əhalisi olacaq Yeni Ağdamda

30 min nəfərlik stadion inşa ediləcək.. 

Dövlət başçısı dünən dağılmış, yerlə-bir olmuş Ağdamda oldu və bu şəhərin bərpası ilə bağlı mühüm təməlatma mərasimlərində iştirak etdi, bir daha region ölkələrinə, düşmənə və dosta quruculuq, sülh və barış mesajları verdi. 

Aşağıda isə şəhərin bərpası üçün ümumi planın qısa təsviri ilə tanış ola bilərsiniz. Bütün məlumatlar şəhərin yenidən qurulması planının təqdimatından götürülüb:

1. Müasir Ağdam köhnə Ağdam şəhərinin özü və  Ağdam rayonunun yaxınlığındakı 8 kəndi əhatə edəcək.

2. Ağdamın ərazicə ölçüsü 1750 hektar, əlavə şəhərətrafı yaşıl zona (bağlar) ilə birlikdə isə 2450 hektar olacaq.

3. Şəhərin əhalisi 100 min nəfər təşkil edəcək ki, bu da, Ağdamı Qarabağın ən böyük şəhəri olmaqla, Azərbaycanın 6-cı ən meqa yaşayış məskəni  edəcək.

4. Əhalinin 70%-i çoxmənzilli binalarda, 30% -i fərdi evlərdə yaşayacaq. Şəhərdə 1750 fərdi yaşayış binası olmaqla yanaşı, çoxmənzilli binalarda 23 min mənzilin olması nəzərdə tutulub.

5. Şəhər ərazisinin 23% -i meşə və park zonalarından (yaşıl zona) ibarət olacaqdır.  Ağdamda əlavə (125 ha) meşə zolağı da salınacaq.

6. Məşğulluğun davamlılığını təmin etmək üçün şəhərin yaxınlığında bir sənaye sahəsi (sənaye parkları) inşa ediləcək.

 7. Şəhərdə süni gölün yaradılması da planlaşdırılır. Həmçinin, şəhərdən 2 kanal keçəcək və bu kanalların üzərində keçid üçün körpülər inşa ediləcək.

 8. Müasir Ağdam tarixi mərkəz, inzibati, yaşayış, yaşıl və sənaye/kənd təsərrüfatı zonalarına bölünəcək.

 9. Tarixi mərkəz əsasən "İmarət" saray kompleksini, Qarabağ xanlarının məqbərəsini, Şahbulaq qalasını və yeni məscidi əhatə edəcəkdir. Mərkəz Qarabağ şəhərlərinin ənənəvi memarlığına uyğun olaraq inşa ediləcək.

 10. İdarəetmə mərkəzi bir futbol stadionundan (30 min nəfərlik), bələdiyyə binalarından, teatrdan, konsert salonundan və Qarabağ Universitetindən ibarət olacaqdır. Qələbənin şərəfinə xatirə muzeyi olacaq bir park və açıqhava konsert salonu da inşa ediləcək.

 11. Şəhər ətrafında sərmayəçilər üçün parklar və turistlər üçün otellər olacaqdır. Şimaldan şəhər bağları Şahbulaq bulağına birləşdiriləcəkdir.  Ağdam bütövlükdə kənd təsərrüfatı turizminin inkişafına yönələcək.

 12. Hər bir fərdi evə kənd təsərrüfatı ehtiyacları üçün 4-5 hektar torpaq sahəsi ayrılacaqdır. Hər evin altına su təchizatı sistemləri quraşdırılacaqdır.  Suqovuşan və Xaçınçay su anbarları, o cümlədən artezian bulaqları su təchizatı üçün istifadə ediləcək.

 13. Ağdam şəhərinin nəqliyyat planı Portuqaliyanın Lissabon şəhərindən ilham alınaraq planlaşdırılmışdır. Şəhərin müxtəlif istiqamətdən

6 giriş-çıxışı olacaq. 

 14. Piyadalara üstünlük veriləcək. Şəhərdə geniş bir piyada və velosiped yolları şəbəkəsi olacaq.

 15. Şəhərdə dairəvi nəqliyyat sistemi istifadəyə veriləcək. Magistral yollardan başqa, öz ayrıca xətti olan tramvay şəbəkəsi də salınacaq.

 16. Müasir Ağdama “Ağıllı şəhər” konsepsiyası tətbiq ediləcək.

 17. Şəhərdəki hər bina məktəb və xəstəxanadan 350 metr məsafədə yerləşəcək.

18. Plan əsas etibarilə Azərbaycan, Türkiyə, Israil, ABŞ, Böyük Britaniya, Kanada, Hollandiya və Almaniyadan olan şirkətlərin köməyi ilə həyata keçiriləcək.