İsmayıllı rayonunda Azərbaycan Respublikasının Təhsil İnstitutu və Dağlıq Şirvan Regional Təhsil İdarəsinin birgə təşkilatçılığı ilə 5-7 iyul 2023-cü il tarixlərində Ağsu və İsmayıllı rayonlarından seçilmiş təhsil işçiləri və fənn müəllimləri üçün təşkil edilən qiymətləndirmə düşərgəsinin açılış tədbiri keçirilib.

Açılış tədbirində Azərbaycan Respublikasının Təhsil İnstitutunun direktor müavini Ülkər Babayeva və Dağlıq Şirvan Regional Təhsil İdarəsinin müdiri Rövşən Əliyev iştirak etmişdir.

Qeyd edək ki, düşərgənin keçirilməsində əsas məqsəd təhsil işçilərinin, xüsusilə müəllimlərin beynəlxalq qiymətləndirmələr barədə məlumatlılığını artırmaq, təhsil siyasətinin formalaşmasında qiymətləndirmələrin rolunu anlamaq, eləcə də onların səriştə əsaslı qiymətləndirmə vasitələrinin hazırlanması istiqamətində bilik və bacarıqlarını inkişaf etdirməkdir. Eyni zamanda, düşərgə iştirakçıları şagirdlərin oxu və riyaziyyat üzrə biliklərinin real həyatda tətbiqi üzrə qiymətləndirmə vasitələri hazırlayacaqlar.

Düşərgənin sonunda iştirakçılar sertifikatla təltif olunacaq.