Ağdamda "Sağlam bədəndə sağlam ruh" devizi altında idman tədbiri keçirilib.

Azərbaycan Respublikasının Gənclər və İdman Nazirliyinin və Azərbaycan Respublikasının Daxili İşlər Nazirliyinin İdman Cəmiyyətinin birgə təşkilatçılığı, Qarabağ  Regional Gənclər və İdman İdarəsinin dəstəyi  ilə 16 oktyabr 2024-cü il tarixdə Ağdam  Olimpiya  İdman Kompleksində gənclər arasında "Sağlam bədəndə sağlam ruh" devizi altında  kross qaçışı və turnikdə dartınma hərəkətləri üzrə respublika yarışlarının Ağdam rayon mərhələsi keçirilib.

Açılış mərasimində öncə Ulu Öndər Heydər Əliyevin və torpaqlarımızın azadlığı uğrunda canlarından keçən şəhidlərimizin əziz xatirələri  sükutla yad edilib.

Tədbirin  məqsədi gənclər arasında sağlam həyat tərzinin və idmanın təbliği, gənclərin Daxili İşlər Nazirliyi sistemində təhsilə və xidmətə təşviq edilməsindən ibarət olmuşdur.

Tədbirdə çıxış edənlər ölkəmizdə idmanın inkişafına göstərilən dövlət qayğısından danışmış, bu cür yarışların  gənclər arasında sağlam həyat tərzinin və idmanın təbliğində  mühüm əhəmiyyət  kəsb etdiyini diqqətə  çatdırıblar.

  Tədbirin rəsmi hissəsindən sonra  yarışlara start verilib.  Müvafiq olaraq I, II, III yerlərin qalibləri Daxili İşlər Nazirliyinin İdman Cəmiyyəti tərəfindən diplom, medal və hədiyyələrlə mükafatlandırılıblar.